一件原本諗住無乜可能做到, 就算做都係50歲前先要完成嘅事, 竟然今年比我完成咗, 重要Sub 4都有找10分鐘, 真係Nothing is impossible!
感謝篇
要多謝就梗係要多謝老婆先啦, 無佢嘅Support, 係無可能一星期跑四課, 其中兩課係星期二四嘅晚飯時間 (當然我仍然有做足我嘅家務啦 ^_^
跟著就梗係多謝黃Sir啦, 從無諗過跟跑會教練練跑, 只係跟下Runkeeper嘅Training Plan嘅我, 好好彩得到Johnson同Eric比咗個機會我加入HKBN嘅Training Team. (上年跟Runkeeper嘅2:30半馬Plan, 結果1:56:42完成, 今年除黃Sir以外嘅長跑課, 我都係Runkeeper嘅4:30全馬Plan練習) 
黃Sir對跑步真係好有熱誠, 真係上完堂行緊去坐地鐵途中都不停教你跑步,喺佢嘅指導下, 真係進步咗好多. (另一個中佬嘅進步重大, 依家重快過我, 超勁!) 在此也要多謝一眾跑友, 他們給了我很多鼓勵同寶貴嘅經驗.
再要多謝嘅就喺嗰四位中佬, 上年認真跑半馬後, 就係呢四條友Push我上全馬, 當時我重不斷話再跑好啲半馬先, 2016先上全馬啦, 結果他們令我提前完成了這不可能的任務. 我雖然講話唔再喺香港跑全馬, 但如果呢四條中佬明年再戰, 我都會跟大隊!
重要多謝城柔嘅師父同衆師兄弟, 因為時間有限, 佢地好包容咁無怪責我少返去上堂(可能有我唔知... )
最後就要多謝我常跑步後冇乜睇嘅後生靚仔Sub4中醫師, 針咗三次內側副韌帶已經好番晒.
雖然我一向對大會安排有好多不滿, 但今年進步的確比以往多, 在此也要向各位盡心盡力嘅義工道謝, 你地落力嘅打氣, 的確為跑手們增添了不少動力 (我走過你們身邊時也有舉起手拍掌向你們示意道謝). 有年大會除咗跑衫都突破外, 全馬補給品也多了一樣, 竟然有車厘茄, 好甜美呀!
全馬過程篇
對於一個菜鳥, 全馬新手, 未見識過撞牆嘅我, 加上兩星期前30km嘅長課, 到咗28km四頭肌就作抽筋, 真係無乜信心可以四小時內完成全馬. 但諗著內側副韌帶已經冇痛, 賽前又有充足休息, 所以口講做4:15, 但心始終想Sub 4完成, 也以4小時計劃分段Pacing.
比賽日, 依計劃一早四點起身食咗件"說謊"蛋糕, 上完厠所, 換上幾天前已準備好嘅戰衣同裝備, 就出發去尖沙咀會合幾位Walkermix經驗老到嘅高手.
一集合就食咗條蕉, 重同佢地講有多條Spare可以比人, 但George兄問咗我早餐食咗咩後, 就提醒我會唔夠飽, 咁我又食多條蕉. 放好行理後熱下身, 另一高手好友Keith又到, 雖然佢跑RUN 1組, 但專登早到為我們打氣, 認真唔話得. 
隨後, 我這隻全馬菜鳥就跟著George兄上線去, 我們企到幾好嘅位置, 鳴鎗後不需50秒已到起跑線, 當時完全無理會在旁嘅高手George, 因為大家唔同Level, 跟著佢只會跑亂自己嘅節奏 (大忌). 我自顧自的跟大隊跑著, 雖然比自設Pacing快少少, 但基於安全問題, 以及自己都應付得到, 就用大約5:20步速開始我這次旅程. 
一路跑, 一路留意著自己嘅步速, 心率, 不斷地同自己嘅身體溝通, 了解自己嘅狀況. 完成了數公里, 平均都係用緊5:20左右嘅步速前進, 比預設步速快了少許, 但感覺良好, 心跳也在160以下, 就繼續用這節奏前進.
上第一條橋(昂船洲大橋), 步速無變, 起初計劃時還諗過要放慢, 有網友重話要慢成分鐘, 但問過Training Team其他隊友, 都話最多慢5-10秒, 加上萬宜同烏蛟騰嘅經驗, 訓練足夠的話其實唔會慢上多少, 而萬宜同烏蛟騰嘅高低落差, 同呢三條橋簡直無得比, 所以就隨著比賽節奏, 繼續均速前進.
到過最高點後, 進度狀態都良好, 信心也大增, 所以無乜睇Pacing貓紙, 只隨著身體感覺前進.
因為第一次跑全馬嘅關系, 好多地方都想用Runkeeper影相, 但又怕死Apps影響成個Planning, 所以都無乜影相.
當去到17, 18km時, 開始有啲餓啦 (幸好有高手George提醒下食多咗條蕉, 否則應該會更早開始餓), 隊咗第一包Gel, 之後都有食少少朱古力同蕉, 一路上感覺良好, 步速約5:20-5:30, 心率維持喺165-170.
過完三橋兩隧, 到28km, 四頭肌開始作抽筋啦, 有過兩次超半馬同萬宜半馬嘅經驗, 我知道這時只要放鬆, 狀態會慢慢地好起來, 果然, 唔夠一兩km, 這感覺已沒有了.
就這樣, 走呀走, 就到達我熟悉的半馬折返點, 起初都有啲擔心人多難以前進, 但這憂慮好快已消失了, 我這步速在這裡這時候所遇到的半馬一組跑手, 速度也差不多. 而我在大家差不多步速嘅情況下, 還可以輕鬆地追過部分半馬跑手, 或在大風路段, 跟著啲有氣有力嘅半馬跑手, 緩緩向西隧前進.
去到西隧口, 當然要去影相位, 同城大嘅打氣團打打招呼! 入到西隧, 不其然地大叫一聲, "最後一條隧道啦". 眼見兩年前要跑跑行行上番呢條隧道, 現在跑完三橋兩隧, 還可以均速前誰, 真是百般滋味在心頭. 上了一大段時, 有諗過搽定啲冬青油, 但見慣在西隧出口嘅冬青油大隊, 這時竟然不見縱影, 後來先知原來那個時候他們還未需要"出動".
上完西隧, 過咗38km, 雖然四頭肌又開始作抽筋, 但對策依舊, 緩緩前進, 好快這感覺又離去了, 這時望望Runkeeper嘅記錄, 3:31走了39km, 唔爆的話Sub4應該有望了, 雖然還有氣力, 但我始終未跑過全馬, 唔肯定身體會有咩反應, 現在無撞牆, 唔代表呢幾km會唔會撞. 雖然心中暗喜, 但還是保持原有速度向以往同一跑道, 但不同的終點進發.
到鬧市人多嘅路段, 身體狀況仍然良好, 心情輕快, 腳步亦稍稍加快, 
終於, 去到維園, 眼見大鐘未到3:50, 就想嘗試加速睇下可唔可以做到, 但知道追唔到嘅時候, 我一啲都無心急, 只高舉雙手繼續前進, 過終點時又大叫一聲, "初馬Sub4, 我做到啦!", 就係咁, 今年以完全無諗過嘅時間, 3:49:20 (大會時計3:50:08), 完成了這個不可能的任務!
小記沿途水站十分充兄, 我就學台灣跑友, 用自己水樽裝水, 到水站時稍停並站在水店旁唔阻人嘅位置, 將水倒入自己嘅水樽, 就這樣, 我唔使每個水站都攞隻紙杯, 飲少少就倒/掉咗佢, 基本上一杯水夠我過兩至三個水站, Overheat時又可以倒少少水落身體降溫, 就係咁, 全程我就用少咗十幾隻紙杯, 同用少幾舊海綿.
